[壹周刊第1094期]私家菜半年 呂慧儀肉償曾志偉

好好味!(設計對白) 腸腸啦!(設計對白)06年港姐季軍呂慧儀(長腳蟹)入行五年,雖然肯搏肯露,卻一直未有機會坐正,直至 08年,主動出招姣掂電影《 Laughing Gor之變節》男主角兼「監製」黃秋生,始由大茄變女主角;自此,跳入大銀幕,去年中,她又再發功,獻身獎門人曾志偉,自願成為私家菜。
蝕頭賺尾,黐住曾志偉有着數,在賀歲電影《我愛 HK開心萬歲》中,她比女主角吳君如、陳法拉更加女主角, mark實揸大旗的志偉做宣傳,兩人公然調情,餵食腸、胸壓,私家菜身份,愈來愈浮面。

截至週日(二月二十日),《我愛 HK開心萬歲》暫時錄得二千五百七十萬票房,成為賀歲檔冠軍,由農曆年前開始的宣傳至連日來的謝票活動,曾志偉幾乎次次帶住私家菜呂慧儀上陣。上週四中國情人節(十七日),二人又孖住在電視城謝票,由於第一女主角吳君如未能準時出現,恃住有曾志偉撐腰的呂慧儀,大發雌威做晒當晚女主人。
甫到場,呂慧儀即醒目搶位,先在工作人員手中攞走貼紙,再親手幫曾志偉貼上身,私家菜服侍周到,志偉即時拉她埋身,跟高層黃家禧及導演鍾樹佳一齊合照,由於有記者在場,呂慧儀顯得有所避忌,整色整水拉扯一輪,先肯埋位。
到「食 嘢」環節開始,曾志偉更加出面,唔理一直圍在他身邊的新咪神沈卓盈及高海寧,全心全意餵私家菜呂慧儀食腸仔,得到「寵倖」,呂慧儀即時笑晒,著住貼身低胸衫的她,更借意回禮,請對方食「波餅」。

曾志偉餵食腸,長腳蟹亦禮尚往來,不時請他「食波餅」。

演藝人協會周年晚會,長腳蟹陪住志偉到場,更成晚跟住他滿場飛,猛咁識電影人。

當正女主角,呂慧儀一到場即搶住幫曾志偉貼宣傳貼紙。

沈卓盈(右二)及高海寧(右一)要自己落手攞嘢食,只有長腳蟹有特權,有志偉餵食腸。

之後曾志偉拉長腳蟹埋位,跟一班高層影合照。

明知有記者追訪,志偉跟長腳蟹做完年宵活動後即分頭走人,本來諗住做司機載私家菜離開的志偉,當日唯有自己揸車入沙田,跟一班麻甩佬食消夜。

06年港姐季軍呂慧儀,模特兒出身,擁有 44吋長腿和豐滿身材,為上位,她從不吝嗇晒腿晒事業線,招數更層出不窮。

露長腿

卸任港姐後,呂慧儀在資訊節目《謎》中擔任行行企企和擺甫士的「謎女郎」。 08年終有機會拍劇《原來愛上賊》,有指她經常黐實李思捷學做戲,對方更將她戲中角色改名為「長腳蟹」,從此成為外號,由於終日大晒長腿,令她成為網民「性幻想對象」。

晒心口

去年《香港先生》選舉,首次擔任大騷司儀的呂慧儀,中門大開,以一件大 V火紅晚裝拋胸騷身材,事後惹來不少批評,廣管局更接獲 29宗投訴,指女藝人賣弄性感,衣著暴露令人反感。

姣拍檔

09年邵氏重投電影圈開拍《 Laughing Gor之變節》,請來影帝黃秋生、吳鎮宇等助陣,原本只演閒角的呂慧儀,在片場傍實黃秋生,貼身侍候幫對方剪手甲,成功姣掂對方幫口向導演要求加戲,風頭蓋過女主角陳法拉。

據了解,一心向上的呂慧儀自從去年上完《獎門人》玩遊戲後,憑住電力十足兼主動爭取性格,成功吸引曾志偉留意,未幾即「入選」成為私家菜,自此,只要曾志偉有份躭弗的電視節目及電影,呂慧儀永無走雞,一定有份。
到拍板開賀歲片《我愛 HK開心萬歲》,原本只是做大茄的她,更加「勤力」, 氹掂曾志偉將她的戲份不斷加重,最後僅稍遜於 孭重飛的吳君如及袁詠儀。
有靠山志偉,呂慧儀終於鍊贏和她經常胸戰鬥餐死的高海寧。首映當晚,變成路人甲的高海寧忍唔住還以顏色,踢爆呂慧儀為求在一班女藝人中突圍而真空上陣,到場後更匿埋廁所,重新整裝,除得就除。