[8 29news]成奎安好友伴走最后一程_网易娱乐论坛
2009.08.29
大儍成奎安前晚因鼻咽癌復發病逝浸會醫院,終年 54歲。他彌留之際,太太、兒孫、好友曾志偉、張家輝及馬海倫等均在其身旁守候,陪大儍走完最後一程。志偉昨表示大儍最放不低是年僅 10歲的細仔,而馬海倫則認為大儍飽受癌魔折磨,現在對他而言可算是一個解脫。
擅演兇神惡煞江湖人物的成奎安, 04年證實患上鼻咽癌後,一直奮力跟癌魔搏鬥,月前鼻咽癌復發,他不停進出醫院,並一度盛傳他體重跌至 100磅。
日前大儍離開養和醫院回家休息,豈料大前日突然發高燒,其家人隨即將他送往浸會醫院醫治,可惜延至昨日凌晨 12時,大儍終不敵癌魔,終年 54歲。
「佢走時好安詳」
前晚大儍好友譚詠麟(阿倫)、肥媽瑪利亞、曾志偉、張家輝及馬海倫等紛紛趕往醫院見大儍最後一面,而他彌留之際,其家人包括太太、兒孫、志偉、張家輝及馬海倫等均在其身旁守候,陪大儍走完最後一程。
趕赴醫院見大儍最後一面的志偉,昨日收拾心情到將軍澳電視廣播城出席《 Laughing Gor之變節》宣傳活動,他透露阿倫前晚 8時許探望大儍後,致電給他表示大儍的情況未如理想,所以志偉 11時許即趕到醫院探望大儍。
當時大儍已不是很清醒,志偉說:「我去到醫生已同佢打咗嗎啡針,因為佢 20幾個鐘都合唔埋對眼,瞓唔到覺,佢唔捨得走。」他表示上星期大儍仍留醫養和,但大儍的病況已去到承受不了化療同電療,故醫院決定停止療程,而大儍也回家與母親、家人等共享天倫,志偉說:「到前日大儍突然發高燒,所以即時送去浸會醫院。
噚晚我同大儍對話唔到,但佢家人叫我同佢傾偈,佢會知我嚟到,佢講唔到嘢,我只係叫佢放心走啦,我知佢放唔低自己 10歲嘅仔,當時佢所有屋企人都喺度陪佢,佢走時個樣亦好安詳,唔係瘦到不似人形,仲係好大隻。
其實佢今次係因為癌細胞復發移咗去肝臟,個過程好快,唔係令佢好多痛苦,唔會話糾纏幾個月先走,佢情況係急轉直下,只係個幾月時間,上次探佢,佢仲話好有希望,仲話個病唔夠佢鬥。」
昔日大儍賽車場上的戰友麻俊昆,本月中曾到醫院探望大儍,並把二人合照放上網誌。
大儍最後一次出席的公開活動,乃是去年 3月的「以愛傳聲」繽紛嘉年華。
耳語籲勿牽掛
曾志偉指大儍離開過程很快,沒有多大的痛苦。
有關大儍喪禮安排,志偉表示會尊重其家人決定,但他會以朋友身份協助其家人辦後事。他表示送別大儍後,他便打電話給大儍的朋友報告情況,並致電給佛教朋友為大儍做些儀式來送別。
馬海倫昨日則在電話中說:「我喺佢耳邊叫佢唔好牽掛,個個都好好,佢有感覺,佢彌留之際,個個都好安靜,忍住唔喊,因為如果一喊嘅話佢會走得唔安樂、唔捨得走,所以佢太太喊嗰陣,我哋都有拖開佢叫佢忍住唔好喊。
後來大儍個大家姐摸住大儍個頭,喺佢耳邊傾偈,大概 11點半左右,大儍就走咗啦,大家都喊得好傷心。大儍一直俾個病折磨,?家對佢嚟講係一個解脫。」
南圍村民感難過
士多老闆成先生跟大儍由細玩到大,對他的離開感到十分傷心難過。
大儍是西貢南圍村長,昨日南圍部份村民已得悉其病逝消息,並表示十分可惜。經營村口士多的成先生對大儍病逝也表現得十分難過,他說:「大家就好似兄弟咁由細玩到大,佢前幾日都有返過嚟,o依家都唔知講乜好。」採訪、攝影:駱華齡、王崇穎、彭琮然
1955-2009年
成奎安前晚不敵癌魔病逝,終年 54歲。
![>[8 29news]成奎安好友伴走最后一程_网易娱乐论坛](https://pic.bilezu.com/upload/1/b6/1b65f60253f2cb40a0611a6780af607e_thumb.jpg)
