假低調暗部署崩牙駒勢必東山再起
一九九九年,本刊專訪崩牙駒,當年他在澳門呼風喚雨,被稱為澳門教父,訪問結束前,他寸爆地留下尾巴:「好多嘢想講,但真係唔係適當時候,等我六十歲,到時話俾你知。」當年他四十五歲,十四年過去,二○一二年十二月,只差一年多便步入花甲的崩牙駒步出澳門路環監獄。門外超過一百名中外記者追訪,他不再囂張,只坐在車廂微笑。據知,鐵窗十幾年寒暑,崩牙駒由最初深深不忿,咬牙切齒,到近年靜極思動。眼看死敵水房賴在出面低調行事,籠絡關係,建立澳門地下新世界,開始洞悉「槍打出頭鳥」的遊戲規則。出獄後,他努力營造低調,迎合大陸要求;同時培育接班,勢必要在兩年內東山再起。「六十歲,到時話俾你知。」崩牙駒說。
週六早上,崩牙駒身穿白色T恤步出監獄,十四年以來,第一次呼吸自由空氣。甫上房車,崩牙駒透過車窗外望,沉靜不語,之後他到氹仔海明灣畔幾千呎複式住宅單位,與母親及家人逐一見面。稍作休息後,下午到銀河酒店一樓的中菜廳金悅軒吃午飯。記者直入酒樓的貴賓房採訪,房內坐滿兩席賓客,崩牙駒換上黑色西裝坐在中間,旁邊是他太太及兩名女兒,笑容滿面。
枱前放滿中式點心,崩牙駒還準備吃甜品楊枝金露,其中一名親友說隔籬貴賓房正是銀河娛樂母公司嘉華國際的主席呂志和。「你睇,仲邊會搞乜嘢唔妥吖?而家各有各做,各有各吃飯,呢啲就係時勢。」崩牙駒其中一名親友和記者在酒樓旁邊進行獨家訪問。「大哥喺裡面咁多年,雖然一直留意澳門,但出到來都知時勢唔同晒啦……「佢喺裡面一直照顧全家上下,六個仔女,六個孫,都係靠佢以前的生意及買樓賺錢睇住成頭家……「其中一個孫仔出世兩個幾月,大哥想幫佢搞個百日宴,大哥的媽媽亦即將八十大壽,大哥的確諗緊兩件事一齊搞個宴會慶祝吓。
「另外,大哥想同一家人出國旅行,最可能去日本,但大哥都要搞身份證護照啲嘢,所以根本好多嘢都未定。「大哥而家唔會接受任何專訪,叫你哋所有記者唔使等了,我哋喺氹仔都有幾個住宅物業,好多都打通。今日我哋都換咗幾架私家車接送,大哥又會住唔同酒店出入,唔會被人跟到,佢唔想再好似以前咁高調。「本來想出去shopping買衫,去吓夜總會見朋友,但係見到咁多記者等佢,佢唯有喺酒店房……「會唔會去賭場賭錢?我可以話俾你聽,大哥現在一毫子都唔賭。」
還記得九九年崩牙駒拖着女友楊愛貞到賭場豪賭,崩牙駒一名頭馬健仔(化名)跟記者說:「駒哥呢十幾年,改變好多。「以前好多擦鞋仔喺身邊搞呢搞路,而家駒哥唔會再咁高調……出面啲人估佢乜估佢物,又話石岐嘟仲係駒哥隻頭馬,我話你知,駒哥近日覺得最開心嘅事就係石岐嘟俾人拉,話佢真係好out好蠢,為咗二十萬就幫人殺人。駒哥話而家唔係以前年代,乜都講打講殺,話澳門警察呢次拉人拉得最啱!」曾任澳葡時代司警的石岐嘟是秘魯人,也曾是崩牙駒契爺,九十年代在崩牙駒旁邊出任軍師。在駒出獄前一週,因涉及買兇殺人罪被澳門司警高調拘捕。健仔表示,現時崩牙駒在澳門賭場勢力只剩下新舊葡京幾個賭廳,由他親妹阿菲及妹夫烏鴉文管理,他的手下豪仔在威尼斯人及新濠天地均有賭廳,美高梅MGM一樓的日昇賭廳亦經常見崩牙駒的手下出入。
「不過其實賭廳的生意大不如前,真正幫駒哥出去搵食嘅人,亦已經唔係以前呢批人,係一批四十歲唔夠新面孔,主力幫駒哥在澳門收料、建立關係,同埋處理一啲外圍網嘅嘢,呢啲先緊要。」據知,其中獲崩牙駒重用的年輕新人,包括大頭光。「大頭光係香港人,以前在澳門欠下街數,被人追殺所以全身刀疤,崩牙駒用佢做保鏢兼打手,亦叫佢學洗米華,從事網上外圍百家樂,呢幾年搞得唔錯。」健仔表示,除了大頭光在駒哥出獄期間充當保鏢,其他親信門生都按崩牙駒吩咐全部暫離澳門,到香港、大陸、台灣及東南亞避風頭。記者電話聯絡他們,他們回電時電話顯示均是香港或大陸的區號。
不少人指,澳門現時形勢,太陽集團的洗米華最能協助剛出獄的崩牙駒。洗米華(全名:周焯華),四十多歲已是上市公司太陽世紀集團及太陽國際資源主席,並掌控太陽金業及財務。洗米華跟豪仔出身,身份是崩牙駒徒孫。由於他一向處事低調,加上交際了得,獲得一批中方背景的VIP支持,很多賭廳廳主都對他非常賞識。「星際五樓全層都係洗米華天下,加上他近年主力搞海外網絡賭業,採用網上即時開盤新招。駒哥都有話洗米華好叻仔,叫班新人學佢,不過話洗米華係駒哥嘅人,唉,你話啦!佢自己賺到錢,點解要同人哋分啫?」健仔說。事實上,就在崩牙駒出獄前一晚,洗米華便以疊碼仔理事身份出席崩牙駒死敵水房賴在氹仔金沙城喜來登酒店的疊碼仔理事會晒馬活動。當晚筵開一百九十九席,場面夠晒墟冚。當晚新選出的疊碼仔理事會的理事,差不多全數都是水房賴的人,包括當選為理事會理事長的小鳳姐,是水房賴現時最得寵頭馬,主理賭廳生意。另外澳門前水房坐館張立群、現任水房坐館阿頭(又名大海),前者替水房賴處理房地產收地,後者管理水房兄弟。「水房賴吹雞,全部賭廳疊碼仔都要俾面出席,四太、向家都要俾面,可想而知佢嘅勢力。」一名有出席宴會的賭廳廳主跟記者說。
該廳主表示,水房賴十四年以來,的確把各賭廳做得有聲有色,今次疊碼仔理事會就是想進一步把疊碼仔系統管理化。
「水房賴希望疊碼仔除了喺賭廳做泥碼生意,以後可以有名有實返大陸追街數,你知道其實而家大部分來澳門賭廳賭錢的VIP都係大陸啲官同有錢佬。」該名賭廳廳主對水房賴讚不絕口,指他十四年來令澳門地下秩序良好,管理得力,亦與澳門及大陸建立良好關係,而且為人低調,讓各方人心悅誠服。
「任何人,話之你係皇帝,佢從來唔出席任何場合,聽講佢最明白當年駒哥就係太高調,所以十四年來冇人影到佢相片,乜嘢佢都派細佬偉哥(水房偉)出來。」
水房偉(全名:賴初偉)是水房賴的親弟,九九年曾參選澳門立法會選舉,最後雖然落敗,但從政以後,水房偉多年來以政治人身份與澳門政府及大陸官場人士不停「搞關係。」
「其實澳門賭業賭廳已經飽和,個餅已經冇乜油水,水房賴近年專注搞房地產,另外,佢覺得要搵大錢,最重要『北望神州』同大陸搞好關係,除咗搵偉哥(水房偉)出面,佢自己就叫屋企人搞咗個宗親會慈善團體,專門搞大陸善事。好似啱啱大陸雪災,佢即刻叫人捐一百幾十萬過去。」
水房賴(全名賴東生)建立的菱峯集團最近便在金光大道附近投資一塊三萬八千平方米地段,市價接近十億,據了解,他初步打算用這地皮興建豪宅。該集團亦有投資環保、科網及飲食。
另外,該集團旗下有一個慈善會,每年在澳門向老人家派米,助學兒童,其網站亦報導該會透過「中聯辦」向內地捐助數十萬澳門元賑災。
「我同你講,而家澳門唔係以前咁,乜嘢都係講利益,講關係,將來可能駒哥都可以和水房賴坐低傾生意,呢啲就係現時的遊戲規則。」該名賭廳廳主說。
「所有人都唔係敵人、唔係朋友、同任何人都可以合作。」崩牙駒的親人及頭馬亦異口同聲說。
曾叱咤江湖的崩牙駒刑滿出獄,雖然已被囚禁十四年,但這當年「世界級」黑道人物,對國際傳媒吸引力依然,數十家中港台及海外媒體有派員到濠江,直擊這位「澳門教父」恢復自由的動向和消息。而在他出獄前一夜,近百名記者更在路環監獄門口,通宵守候希望拍得崩牙駒步出牢房的一刻。十二月一日當日,英國廣播公司(BBC)就即時在其網頁以「Macau's gangster Broken Tooth released」為題,報導了崩牙駒出獄的消息。除了英國廣播公司外,美聯社、路透社、彭博通訊社以至泰國《曼谷郵報》等國際傳媒,亦有報導相關消息,當中重點提及澳門政府以至北京當局均嚴陣以待,關注崩牙駒日後的去向。中共喉舌《環球時報》亦以「黑幫教父出獄令港澳緊張」為題,講述崩牙駒出獄的清況,亦分析他出獄後的動向和可能對澳門社會造成的影響。
雖然崩牙駒是一名江湖猛人,不過他對身邊的女人永遠柔情。十四年牢獄生涯中,只有一人風雨不改,每週兩次入獄探崩牙駒,此人便是駒母陳麗萍。而崩牙駒亦侍母至孝,出獄後要做的第一件事便是要替母親擺壽宴,並堅持以後永不令她傷心。
除了母親外,崩牙駒亦十分疼惜自己的女兒。除了和前女友建安娜所生的長女外,和前女友楊愛貞所生的女兒尹倩君,亦十分得崩牙駒愛錫。除了自己的母親和女兒,崩牙駒對自己愛過的女人亦十分照顧,楊愛貞就曾表示,尹國駒仍有給她家用,「是個非常負責任的男人。」
