高海寧唔想靠男人 「重口味」帶挈上位
徐子珊憑無綫劇集《雷霆掃毒》1秒強暴戲擸走「我最喜愛電視女角色」獎,高海寧(高Ling)亦憑新劇《法網狙擊》中的2秒完事「閃姦」戲出位,雖然畀高登爸打大鬧僅得「白滑玉背」唔夠勁,嗌搵笨要回水,但高Ling都賺咗全城焦點,她剖白道:「我冇諗過要靠呢啲重口味上位,我只希望可以洗底從良,做番個乖乖女,唔使再做二奶同情婦!」
去年11月,高海寧被指「黐殼」(老闆陳國強),更成功踼走徐子珊成為公司新「老闆娘」,嬲到她淚如雨下,至今高Ling仍然耿耿於懷。她要強調,在《法網狙擊》中得到咁大發揮,跟傳聞冇關:「監製文偉鴻搵我做呢個角色,係因為角色嘅背景同我有些少相似,我媽咪都係擺街邊檔,我哋住過天台屋,都係靠努力去改善生活嘅人,而且好有正義感,角色係監製同編劇同我度身訂造,我等咗好耐先得到咁好嘅角色,所以好開心。
第一次聽古仔時,仲感動到喊,希望都可以感動到觀眾,睇到我嘅另一面,日後可以有更多唔同方面嘅發展,唔係只局限做情婦。唔知係咪我天生個樣好成熟,所以係情婦角色嘅必然選擇!」
首次拍被姦戲,高Ling感覺良好,她憶述說:「拍戲嘛,被姦都冇所謂啦,而且監製好顧及我感受,試位時唔使露背,正式埋位嗰陣工作人員會拎住件浴袍從旁做準備,對手白健恩又好有紳士風度。」
屈指一算,最近高Ling工作量的確倍增,除了《法網狙擊》外,更跟蘇民峰主持《順風順水》及演出《傳愛事務所》和賀歲片《我愛HK2013》,連她也不否定今年機會特別多。她堅定說:「我唔怕畀人非議,因為我行得正,企得正,絕對冇『黐殼』呢回事,所謂有相有證據,呢啲相係絕對唔會影得到,因為自己知自己事,我都冇做過,我未正式見過佢,又傳富商送車,部車我買咗兩年幾嘞,月供5000幾蚊,供足5年,停車場、牌費、保險、油錢統統都係自掏腰包,每月找卡數時好肉痛,我邊有咁好彩呀?不過,自己搵錢自己使好有滿足感,唔使受制於人,唔靠男人包養,更加心安理得。
」
27歲的高Ling直認有人追,但她好難追,入行前試過有人追足一年得個吉,她解釋說:「因為我好理性,唔善解人意。」
對於老闆陳國強的印象,高Ling一本正經:「佢係好老闆,肯加人工畀員工同藝人,過年又大派利是,台慶時仲設盤菜宴。喺大時大節我先見到佢,見到佢梗係唔敢提緋聞啦,我好尊重上司,輩份好分明,唔敢同老闆、高層樂小姐(樂易玲)講多句,見到老闆最多打個招呼講句:『你好!』當冇事發生過。」
