伍允龙刘佩玥 【睡前一贴】伍允龙丨被刘佩玥劲冧:唔使讲都知我哋一对

刘佩玥劲冧伍允龙:唔使讲都知我哋一对 武打男星伍允龙(Philip)与刘佩玥(Moon)去年拍摄热播中的无綫剧集《城寨英雄》传挞着,外间觉得他们合衬,但原来两人第一次见面时连一句说话也没有讲过,刘佩玥更觉得他又恶又酷,没有太多好感。

后来他们全靠咏春入门式“小念头”,一招将冰山劈开,迅速成为好朋友。伍允龙不讳言与刘佩玥拍摄三个半月朝夕相对,若非成为好朋友,或许喜欢上她,但他强调目前是好朋友关系,未有再进一步。

伍:伍允龙 刘:刘佩玥 刘佩玥与伍允龙名副其实不打不相识,由初次见面没有太多好感,到迅速熟落成为好朋友,全凭一招了! 刘:第一次见觉得你好Cool、好恶,戴住副太阳眼镜,又掩住个鼻不停同助手讲嘢,好似唔想同其他人倾偈咁,好似世外高人,第一日都冇同你讲过嘢,哈哈。

直到发生“小念头”事件大家先开始玩、开始熟落,原来第一次见面系唔准嘅。 伍:其实嗰日我系鼻敏感流紧鼻水,我拍咗好耐嘢,知道唔系每个演员都锺意玩,所以都要揣摩吓你玩唔玩得先,唔可以一开始就咁放,慢慢熟悉好啲。

刘:我都有怀疑过你成日用呢啲招数嚟吸引女仔啰! 伍:我使乜用呢啲招数呢,就算用呢啲招数都吸引唔到女仔啦!讲起都想喊,呜… 呜…呜… 点解唔敢望阿Moon? 刘:真系估唔到你咁多嘢讲,多嘢讲到有啲烦,又成日讲笑话,但系又唔好笑喎!

都唔知畀咩反应好,后来发觉唔畀反应系最好,你啲Gag太烂喇! 伍:我同袁伟豪已经成立咗个烂Gag小组啦!

围读第一日我都唔敢望阿Moon,其实唔系Cool,自己喺TVB嚟讲系一个新人,唔想烦到人,大家误解咗我Cool啫!直到记者会之后,我问你识唔识功夫,你就懒叻话自己识功夫,就叫你试嚟睇吓。 刘:呢个唔系事实,系你问我识唔识打,我话唔识。

你话少少都识啩,我话识“小念头”,你就叫我耍嚟睇吓,我耍第一招,你已经拍晒手掌喺度笑我话好犀利、厉害、厉害,好唔尊重人啰! 伍:因为呢一招,大家就打破咗隔膜,Ice Break,拍戏最紧要开心。

由朝见到晚 关系好Close 《城寨英雄》中,两人由欢喜冤家到经历同生共死,现实中他们拍摄时传出挞着,被拍得撑枱脚,恋情传到似层层! 刘:剧本写得好,好有起承转合,由欢喜寃家开始,一齐去经历波澜、生死,感情系慢慢积聚,唔使讲出口大家都知我哋一对。

伍:拍剧同电影唔同,有好长时间可以铺排,呢套剧嘅感情线好童话。有人会问拍戏会唔会投入咗落去,喺香港有拍拖戏就一定会传绯闻。

刘:拍戏一定会投入咗个角色,要同对手有连系先可以有嗰种感觉,如果冇交流,自己都唔信,观众又点可能信呢? 行惯“孖咇” 变得依赖 伍:我同阿Moon好快建立咗好Close嘅关系,开工三个半月由朝早见到夜晚,唔系做好朋友,就可能锺意咗你,哈哈!

因为你好爽、好大方,大家都玩得好开心。我又唔熟TVB呢,你带住我周围走,变咗好依赖,我中文又有限,好多词语都唔识读,大家就因为咁变成咗好Close嘅关系,连啲同事都误解咗我哋,哈哈!

刘:秋姐(元秋)有次喺大班人面前问我,Philip去咗美国你咪会好伤心、好唔舍得啰?我话点解呢秋姐?秋姐话我哋拍紧拖㗎嘛!大家听完喺度笑,好好笑、好开心,成套剧拍完大家到依家都系好好嘅朋友,呢种情感最紧要。

互相欣赏 劲啱Key 情侣或朋友,往往只差一步,刘佩玥与伍允龙会否跨过这一步呢? 伍:或者咁讲,未来乜都有可能性,但系总之呢刻系好朋友。咁啱呢套做情侣啫!

相信我哋认识到都一定会做到好朋友,因为你拍戏好认真、好专业,里面唔系好多打戏,但系一拍动作戏就唔锡身,你睇吓整到成身损晒,我几尊重呢个演员,尊重自然就会变成欣赏,你都好欣赏我嘅专业,因为咁大家做到好朋友,人哋点讲、人哋点传,我哋控制唔到。

刘:你讲得好好,冇补充。 伍:我哋平时都会出嚟倾吓偈,讲吓工作、讲吓自己嘢,因为你读电影,我又好热爱电影,大家有好多共同话题好好倾,所以好快变咗朋友。 私事低调 唔使加盐加醋 刘:同亲男仔出去食饭就会传绯闻,咩疑似拍拖,咁讲对我、对我嘅朋友都唔公平,不过,我嘅性格比较积极、开朗,唔会畀呢啲嘢影响到大家嘅感情。

其实食饭啫,唔使再喺啲餸上面加盐加醋,啲餸够味㗎喇!

同埋我哋都传到好闷,大家都唔会觉得系真! 伍:亚洲嘅文化好奇怪,男仔、女仔好似唔可以拍拖,拍拖就会变成话题。自己唔系为咗形象,只系觉得做演员已经乜都畀大家睇晒,喊到流晒鼻涕、畀人打到牙血都喷埋出嚟,某程度上希望生命某一部分系属于私人,所以私人嘢唔会讲太多,希望低调啲!

后记:大只仔爱狗仔 访问当日,见到刘佩玥抱住一只可爱的约瑟爹利逗玩,原本以为是其爱犬,但倾谈间才发现这只娇滴滴的小狗原来属于伍允龙。一身肌肉的伍允龙抱起爱犬Emme,更显得小狗十分的骰,大男人与的骰约瑟爹利构成有趣画面。伍允龙原来一直锺情细狗,尤其