[face周刊第205期]面對面 悶人出口 陳鍵鋒

「要多謝 TVB 咁多機會我,雖然唔係主角,我已經覺得自己好幸運!」「我唔睇重名利,做演員磨練演技最重要。」
「上唔到位做一線?唔緊要,配角比主角更有發揮!」
「我唔恨攞獎,角色得到觀眾認同已經係最大獎勵……」
十個電視台藝人接受訪問,有十一個都像讀劇本似的,喜歡重複以上對白。幾年裏,聽了不下一百幾十次。原諒我常會有點走神,他說他的,我心裏的潛台詞是:「夠——啦——!!!到底幾時有人夠膽講真話?」
發夢都估唔到,有一天,這個打破悶局的人會是陳鍵鋒。
今年 33歲的陳鍵鋒,出身於教會家庭, 99年簽無綫合約藝人到去年 8月滿約, 11個年頭的形象,一直溫婉有禮有家教、甚至還帶點娘娘腔。放了個長假回歸宣傳《洪武三十二》,上有線、遊亞視,炮轟無綫孤寒小器制度不公,開親口都句句有骨,突然像變了另一個人。
無綫正面對小生花旦離巢潮,不想受合約限制、自由自在北上搵真銀可以理解,我問陳鍵鋒,為甚麼不像林保怡好來好去人人讚有大將之風,答案又是你估都估唔到,竟然出自陳鍵鋒之口:「咁觀眾想聽林保怡講定我講啫?報紙雜誌出咁多期,係出我定林保怡呢?」
陳鍵鋒說,過去十一年間,常被記者投訴:「你講嘢好悶,唔想做你訪問。」
說實話,過往我也試過怕悶,把專訪陳鍵鋒的機會推給同事代勞,這一回竟然撞正悶人出口,認真是鴻運當頭十年一遇。

過去一個月,陳鍵鋒走勻各大小傳媒、收費電視鬧爆無綫,訪問前兩天,連亞視都上埋,說是要「同老細傾傾合作」,又說參觀別家電視台感覺新奇,繼續寸嘴、繼續剃前東家眼眉。
「我唔係長毛、唔係毓民,唔係要鬧爆。正常人喺一間公司做咗十幾年,離開,總有啲感受分享。其實我講嘅唔止呢啲,報道鍾意喺當中揀負面嘅嚟講,標題將負面渲染得更負面,呢啲咪娛樂新聞囉!」
到亞視一遊,陳鍵鋒還對記者說,無綫這種唯我獨尊的制度遲早會被衝擊,沒有人走出第一步,只好自己來:「我講咗咁耐,見到有啲人趷個頭出嚟,又想講又唔敢講,趷趷吓又縮番入去……咩啫!電視台制度應該要變,藝人應該可以去唔同傳媒露面,應該要有人行出嚟,我喺呢間公司咁耐,見唔到有人做,咪我做囉!」
就算遲早要變,大家心中有數,絕不可能是短期的事,得罪了在華人世界最有影響力的電視台之一,不少人替陳鍵鋒後路擔心:「擔心咩?返唔到轉頭?前兩日我做嘉賓嘅《今日 VIP》先至播出,根本就冇嘢!就算有嘢,喺任何一個情況之下,都唔會逼死一個人。唔打呢份工,我大可以做第二樣嘢,問題係我願唔願意放下身段啫!」

見到有啲人趷個頭出嚟,又想講又唔敢講,趷趷吓又縮番入去……咩啫!

月初出席《洪武三十二》宣傳,接受訪問要外事部高層曾醒明監場防再爆大鑊,陳鍵鋒解釋:「曾生待我似世侄,嗰日係同我食完飯,佢本來下午要行山,係我叫佢唔好去,來陪我。」《蘋果日報》圖片

頭 part訪問,三個字,大口氣。一個人之所以可以大口氣,是因為覺得自己有能耐,這帶出了陳鍵鋒去年 8月拒絕與無綫續約的根本問題,無綫提出的續約條件,遠遠不及陳鍵鋒認為自己的市場價值。早前的本刊訪問,陳鍵鋒也說過,明明是一線,卻被當二打六,遇着親生仔林峯、黃宗澤,永遠是陪襯:「每間公司都實有唔公平,電視台更加係。咁多年,台慶劇永遠唔會有我份、頒獎禮提名攞獎諗都唔使諗,咩亮燈儀式、台慶排位,各位記者朋友有眼睇。到約滿傾條件,佢覺得我嘅市場價值係得咁多,」陳鍵鋒邊說邊用拇指與食指比畫,邊說:「我唔覺囉。」
我不同意這個說法,舉例經理人合約屬於中國星的黃浩然,近年在無綫也可獲得重用,既能拍台慶劇也獲得了去年的「飛躍進步男藝員」大獎,難道是有人在電視台不夠乖巧?不會討高層歡心?
「工作一 part,我一向乖巧,以外嘅嘢,我一向唔會太進取。

我屬於好傳統嗰種人,乜返工唔係靠能力,唔應該靠手段嘅咩?」
陳鍵鋒承認,忍氣吞聲 11年,無非為了儲夠彈藥博一鋪:「冇人夠膽唔袋住籌碼就 show hand, 11年唔出聲、儲彈藥都要嘅,?家又唔係話好有,可以博吓囉。」
出刊的前一天( 25日),陳鍵鋒出發橫店拍攝內地劇《搜神傳》,接下來還有兩三套劇集等他埋班,工作排到年尾,陳鍵鋒說自己實際的市場價值,比無綫以為的高出不下十倍,絕不是怕返唔到轉頭怕被無綫封殺無法立足,賺夠轉行是早就有的計劃:「假設人生有八十年命,用大概 20年做一份工作,對我嚟講已經好足夠。諗過去流浪、打算周圍去潛水,退休後可能教潛水亦可能去讀書,我計劃喺 40歲前可以唔再做戲,想自己最後留喺人哋心目中嘅印象都係偶像,我真係接受唔到自己有朝一日拖住仔女、要扮人哋爸爸囉!」

新劇《洪武三十二》淪為大配角,主角謝天華論樣貌論年紀都差陳鍵鋒一截,親生仔和街外人的分別一目了然。

大把內地劇拍的陳鍵鋒說,無綫沒有高層請他收聲,雙方亦傾緊合作,與林心如的新作《美人心計》就正在無綫收費台播出。

外表俊美,陳鍵鋒在 08年劇集《王老虎搶親》中的反串造型更是讓人驚艷,一度成為宅男和同志網的「女神」。《壹週刊》圖片

父親是教會幹事、姐姐是傳道人,家底乾淨、形象健康的陳鍵鋒多次獲委任紅十字之星以及得到健康之星等榮譽。

女裝扮相出名嫵媚,即使男兒身亦永遠青靚白淨一絲不苟,貪靚又怕老的陳鍵鋒這些年來一直脫不掉斷背嫌疑,最攞膽緋聞莫過於 07年拍攝《律政新人王 II》被傳與官恩娜爭吳卓羲搞到勢不兩立。陳鍵鋒再次澄清, 33年以來一直都是「直」男,連半點「攣」的疑惑也沒有過。
「曾經真係好介意人哋點睇,直到有一次,朋友話我聽,喺便利店門口嘅雜誌架聽到兩個女生對話,指住本標住陳鍵鋒咩同性密友嘅雜誌封面話:『咦……係啦……佢不嬲係 o架啦……』買又唔買,揭都唔使揭開睇吓講乜,講完,走咗。嗰次以後,我睇開咗,有啲人係要咁睇你,改變到咩?結埋婚,咪一樣有嘢講:『有本事生個仔出嚟睇吓!』生完,一樣可以話唔知係咪試管啫!唔通真係搵日要打開房門畀大家參觀咩?」
入行 11年,只跟男性密友傳過緋聞,女生像是薛凱琪、官恩娜、楊思琦則合作完清一色只傳不和。陳鍵鋒說目前單身,過去的女朋友圈中圈外人都有:「每次開始我總是諸多顧忌,一旦開始,我可以瘋狂投入到你唔信。拍劇拍到天光,得嗰一陣都想趕去見佢一面,突然有幾日空閒,二話不說訂機票同佢陽光海灘亦都會。不過拍咁多次拖,次次都係我俾人飛,一腳踏兩船又有、話感情淡都有,原因不外乎一個,話我冇時間陪。我都係一個普通男人,曾經幻想過要趁後生結婚生仔、最怕老來得子同個仔有代溝,唉,唔到我唔認命,都要遇得啱至得 o架!」

曾經與楊千嬅丈夫丁子高、古天樂男經理人等傳過緋聞:「根本你哋心裏面有答案,次次一班人有男有女,都實要安個男性密友畀我。」

自稱有過不止一位圈中女友,陳鍵鋒更常遇到的新聞還是與女星傳不和,比如 07年傳出與官恩娜爭吳卓羲。《忽然 1周》圖片

無綫親生仔,最近一個二個遇上桃色風波。
上一期專訪,廖碧兒暗示,拍拖多年,陳豪一直把事業、形象放在第一位,從不重視女友感受。
陳鍵鋒說:「冇錯喎,邊個唔係擺自己喺第一位?我都係!」
林峯被前女友潘霜霜連環爆料一個月,陰功到要哭求對方收手。
陳鍵鋒說:「入行第一日已經知道要小心識朋友,我都唔會公開戀情,容乜易一分手就俾人話賤男、薄倖,冇必要令自己演藝事業多個污點。」
除了談戀愛比親生仔理智得多,坐在陳鍵鋒身邊,我一直看着他的側臉,不得不說,這個美少男的鼻子長得又高又挺,還是天然沒經過加工的,電視台沒有把他留住當親生仔,蠻可惜的。